وزارت منصوبہ بندی کا 2022 کے سیلاب سے متاثرہ اہل خاندانوں کی بحالی کا عزم، بلوچستان میں 68,992 مکمل تباہ شدہ مکانات کی تعمیرِ نو کے لیے امداد کی فراہمی جاری رہے گی۔

وزارت منصوبہ بندی اور ترقی نے واضح کیا ہے کہ حکومت 2022 کے تباہ کن سیلاب سے متاثرہ ہر اہل خاندان کی بحالی کے لیے پرعزم ہے۔ یہ بیان ان رپورٹس کے جواب میں سامنے آیا ہے جن میں دعویٰ کیا گیا تھا کہ وفاقی اور صوبائی حکومتوں نے ورلڈ بینک کے تعاون سے چلنے والے بحالی کے منصوبے میں ایسی تبدیلیاں کی ہیں جس سے بلوچستان کے متعدد خاندانوں کو ان کے وعدہ شدہ گھروں سے محروم کر دیا گیا ہے۔ وزارت کے مطابق PDNA کے ذریعے بلوچستان میں 68,992 مکمل طور پر تباہ شدہ مکانات کی شناخت کی گئی ہے جو تعمیرِ نو کی امداد کے اہل ہیں۔ یہ تمام مکانات Integrated Flood Resilience and Adaptation Programme (IFRAP) کے تحت مالی معاونت کے حقدار ہیں۔ اس کے علاوہ 58,016 جزوی طور پر متاثرہ مکانات کے لیے خود بحالی کی سپورٹ فراہم کی جا رہی ہے۔ سرکاری اعداد و شمار کے مطابق 10 اگست تک مجموعی طور پر 74,988 مکانات پر کام شروع ہو چکا ہے، جن میں سے 26,357 مکانات مالک کی نگرانی میں تعمیراتی ماڈل کے تحت مکمل کیے جا چکے ہیں۔ وزارت نے موقف اختیار کیا کہ IFRAP ایک کثیر الشعبہ پروگرام ہے، جس کا مقصد صرف گھر بنانا نہیں بلکہ اسکولوں، صحت کے مراکز، آبپاشی، سڑکوں اور پانی کی فراہمی جیسے بنیادی ڈھانچے کو بھی بحال کرنا ہے تاکہ مستقبل کی آفات سے نمٹا جا سکے۔ بیان میں بتایا گیا کہ WB کی فنڈنگ کو ایک شعبے سے دوسرے شعبے میں منتقل کرنے کا فیصلہ وزیر اعلیٰ سر فراز بگٹی اور وزیر منصوبہ بندی احسن اقبال کی قیادت میں پروجیکٹ اسٹیئرنگ کمیٹی نے کیا تھا۔ ہاؤسنگ کے لیے منظور شدہ 155 ملین ڈالر کی لاگت کے مقابلے میں تقریباً 161 ملین ڈالر خرچ کیے گئے ہیں۔ دوسری جانب، پروجیکٹ کے نفاذ اور کارکردگی سے متعلق تحفظات کے پیش نظر اسٹیئرنگ کمیٹی نے ایک آزاد اعلیٰ سطح کی انکوائری کا حکم دیا ہے تاکہ حقائق کی شفافیت سے جانچ کی جا سکے اور کوتاہیوں کی ذمہ داری طے کی جائے۔ ورلڈ بینک کی دستاویزات کے مطابق IFRAP کے ہاؤسنگ یونٹ نے 231,749 اہل مستفیدین کی شناخت کی تھی، تاہم اسٹیئرنگ کمیٹی نے ہاؤسنگ سپورٹ کی حد مقرر کر دی جس سے 119,049 تصدیق شدہ خاندان مالی امداد سے محروم رہ گئے۔ WB کی کنٹری ڈائریکٹر Bolormaa Amgaabazar نے 30 جولائی کے ایک خط میں اس فیصلے پر تشویش کا اظہار کرتے ہوئے کہا کہ اس سے صوبوں میں غربت کی صورتحال مزید خراب ہو سکتی ہے اور اب تک 66,120 شکایات درج ہو چکی ہیں۔